Fundjavat sidomos ato me shi, për mua janë frymëzim për të gatuar receta të ndryshme dhe kalorike :). Kalamajtë e duan shtëpinë me shokët e tyre që të luajnë dhe mamaja gatuan për ti kënaqur. Më duket sikur kuzhina dhe shtëpia ime nuk pushon kurrë në fundjavë. Sipas traditës duhet të kishim grosh për ditën e hënë, por kishin mbetur aq shumë gjëra nga fundjava sa grosha do shtyhet për të martën :).

Të shtunën pasdite një komshi e imja që ka jetuar për shumë vite në Greqi, Denisa më rikujtoi një nga recetat greke “tiropitakia”, të cilën unë për herë të parë e kisha provuar nga duart e tezes time Arjeta, e cila jeton po ashtu në Greqi. Vështirësia e gatimit të byreçkave ishte vetëm të vendosje me çfarë do t’i mbushje dhe të vije në punë dhe çunat për ti realizuar format sa më shpejt :). Shija e garantuar për gjithë familjen. Të buta, të shijshme, të shkrifta këto byreçka do i provoj pak më shpesh gjatë dimrit.

Unë për mbushjen vendosa të përziej 3 lloje djathrash, pasi doja të siguroja një mbushje kremoze, jo si receta tradicionale djath i bardhë dhe vezë. Receta më poshtë:

Përbërësit:

500 gr miell që fryhet vet

1 filxhan çaji kos

1 filxhan çaji vaj vegjetal

Kripë

Për mbushjen

200 gr gjizë pa kripë

200 gr djath të bardhë

200 gr djath të butë pice
1 kokër vezë

Përgatitja

Zëm brumin dhe e lëm të vijë për 20 minuta. Brumi zihet si brum i zakonshëm byreku. Nëse brumi ju del pak i ngurtë shtoni kos derisa të arrini butësinë e duhur.

Përziejmë djathrat.

Me duar hapim forma rrethore mbështetur në tavolinën e punës dhe i hedhim një lugë nga mbushja me djath. Mbyllin në formë gjysëm hëne dhe i zbukurojmë me pirun :). I lyejme sipër format me të verdhën e vezës. Me këto përmasa dolën rreth 19 byreçka. Unë e vura tavën dy herë.

Pjekim në mes të furrës në 180 gradë, derisa të marrin ngjyrë të artë. Ju bëftë mirë.

Byreçka me djath (Tiropitakia)

Atelieri i Përbërësve

Komentet (0)

Lini një koment