Ja dhe këtë recetë të kripur, e më pas do postojmë receta ëmbëlsirash se na ka shkuar mendja. Por nuk rrija dot pa e postuar versionin e kish me presh të Ejonës, e cila është jo vetëm kolegia ime, por siç ja u kam shpjeguar dhe në një postim të disa muajve më parë është dhe një blogere e shkëlqyer gatimi. Nëse preferoni recetat pa mish dhe ëmbëlsira plot stil, blogu Ejonës http://mandarina-yum.com/sq/ është vendi i duhur për t’u drejtuar.

Në stinën e dimrit ku perimet bazë janë preshi, spinaqi dhe lakra unë përpiqem të sjell sa më shumë versione të byrekut me spinaq dhe presh, pasi kjo është mënyra e preferuar e marrjes së këtyre perimeve nga fëmijët e mi. Ndaj dhe receta e Ejonës më tërhoqi menjëherë dhe e kam bërë për herë të parë që ditën që ajo e postoi në blog. Hera e dytë është sot për ju. Nëse herën e parë e gatova recetën fiks sipas Ejonës, herën e dytë bëra ato ndryshimet e stilit Bonbon, që nuk rri dot pa futur hundët në çdo recetë 😜.

Nuk janë ndryshime thelbësorë në shije, do ja u shpjegoj në vijim.

Përbërësit për krostatën:

50 gr gjalp

20 ml vaj ulliri

50 ml kos

250 gr miell

¼ lugë çaji pluhur pjekës

Kripë

Përbërësit për mbushjen:

2-3 trupa të plotë preshi pa bishtat

2 lugë vaj ulliri

1 lugë gjalp

2 kokrra vezë

100 ml pana për gatim

100 gr gjizë pa kripë

Kripë, pipër, arrë moskat

Përgatitja:

Fillojmë me përgatitjen e krostatës së kish. Shtojmë gjalpin e tretur, vajin e ullirit, kosin në një enë. Shtojmë kripën, pluhurin pjekës dhe miellin pjesë pjesë duke e trazuar fillimisht me një lugë druri e më pas me dorë, derisa brumi të mblidhet e t’ju lëjë me duar të pastra. Do përfitoni një brumë shumë të butë dhe sipas këshillave të Ejonës ky brum duhet të rrijë i mbledhur me një qese gatimi në frigorifer për të paktën 30 minuta. Një sekret Bonbon këtu 🤗, unë herën e parë i ndoqa siç dhe ju thashë me përpikmëri këshillat, herën e dytë për të përfituar kohë nuk e futa fare brumin në frigorifer dhe rezultati ishte i njëjtë 🤗.

Ndaj lyejmë këndin e punës me pak miell dhe hapim brumin me një pec në formë rrethore pak më të madh sesa diametri i tavës ku do pjekim kishin. E ç‘pojmë gjithë masën e brumit me pirunë dhe e vendosim brumin për të pjekur në 180 gradë fillimisht për 10-15 minuta.

Ndërkohë që brumin e kemi futur në furrë fillojmë përgatitjen e mbushjes. Pastrojmë preshin. I grijmë dhe i vendosim në një tenxhere gatimi ku kemi shtuar gjalpin dhe vajin. I kaurdisim për disa minuta derisa preshi të ulë vëllimin dhe të fillojë të zbutet. E heqim tenxheren mënjanë dhe e lëmë pak masën të ftohet përpara sesa të hedhim vezët.

Meqë unë kisha në shtëpi pana dhe rikota të hapura, vendosa t’i përdor në vend të 1 gotë qumësht dhe djathit të bardhë që kishte përdorur Ejona. Mund t’ju them që të dyja versionet dalin super të shijshme.

Kur masa e preshit është ftohur pak shtojmë aty vezët, kripën, piperin, arrën moskat, panën dhe gjizën. Masa është gati për tu shtuar tek tava që e kemi lënë në furrë për 15 minuta.