Pavlova është një ëmbëlsirë që ka pak vite që e ofrojnë disa pastiçeri në Tiranë. Sa herë është sezoni i luleshtrydhes them do shkoj ta provoj një të tillë, por dembele siç jam nuk e bëra asnjëherë, derisa më në fund vendos ta provoj “pavlovën” në shtëpinë time :)

Pavlova kërkon pak vëmendje gjatë përgatitjes së mafishes sic i themi ne pjekjes së të bardhës së vezës me sheqer. Kujdes duhet treguar gjatë pjekjes së mafishes duke i dhënë kohën e duhur, në temperaturën e duhur, si dhe ftohjes së saj. Pjesa tjetër është një lojë fëmijësh :). Pavlova është një ëmbëlsirë tamam mafishe, të shkrihet në gojë dhe duhet të përtypësh vetëm copat e luleshtrydhes që ka në krye :). Unë pashë disa receta në internet, por u përqëndrova tek të dashurat e mija Nigella dhe Laura. Provojeni si recetë, është fiks koha e përshtatshme për ta bërë.

Përbërësit:

7 kokrra vezë

200 ml pana e ëmbël

7 lugë sheqer të plota

2 lugë çaji niseshte

1 lugë çaji uthull molle e bardhë

Luleshtrydhe

Përgatitja:

Ndajmë të bardhat nga të verdhat. Fillojmë t’i rrahim të bardhat dhe kur masa të jetë thuajse gati, shtojmë një ngë një lugët me sheqer duke rrahur për disa minuta, derisa sheqeri të jetë tretur dhe masa e mafishes të duket e bardhë e shndritshme.

Shtojmë niseshten dhe uthullën dhe trazojmë lehtësisht në të gjithë masën.

Ja dhe mami Lika në #bonbonkitchen :)

Në një tepsi të sheshtë, shtrojmë letër gatimi duke i ngjitur cepat e saj që mos të lëvizi me të bardhën e vezës si në foto :).

Hedhim masën duke e rregulluar me një lugë të sheshtë në formë rrethore. Sobën e kemi ngrohur më pare në temperaturë maksimale. E ulim temperaturën në 140 gradë përpara se të fusim mafishen për të pjekur.

Vendosim tavën në mes të furrës dhe e lëmë të piqet për gati 50 minuta në 140 gradë. Mafishja merr një ngjyrë të artë, fikim furrën, hapim gjysëm derën e furrës dhe e lëmë të ftohet tërësisht mafishen në furrën me derë gjysëm të hapur.