Jemi në muajin e duhur për të ekzagjeruar me receta jo të përditshme. Kjo sallatë që unë mund ta quaj dhe një shportë freskie plot shije, shkon mjaft në tavolinat festive si shoqëruese e mirë e sallatava të tjera, djathit apo mishit.

Për herë të parë këtë sallatë e kam provuar tek Suela…..po po, ajo është, Suela e Kullureve :). Ju kam thënë që Suela të befason me përbërës shumë të thjeshtë, por që qëndrojnë mjaft mirë me njëri tjetrin. Suela e ka zakon të na ftojë javën e parë të vitit dhe neve ajo tavolinë na shijon sikur të jetë dita e vitit të ri :). Mezi po presim radhën këfë vit :). Përbërësit më poshtë.

Përbërësit

3 kokrra mollë jeshile

2 degë të plota selino

fruta të thata (arra, lajthi, kikirikë)

rrush i thatë

lëngu i një limoni

1 lugë vaj ulliri

Përgatitja

Qërojmë dhe grijmë mollët në kubikë. Qërojmë selinon nga sipër me grirësen e patates për të eleminuar fijet dhe grijmë në kubikë. Bashkojmë mollët dhe selinon në tasin e servirjes. Shtrydhim një kokërr limoni dhe lëngun e shtojmë tek mollët dhe selinoja.

Nëse frutat e thata nuk i kemi të pjekura, për një shije më të mirë i japim një pjekje në një tigan që nuk ngjit. Bashkë me rrushin e thatë i shtojmë tek mollët. Hedhim një lugë vaj dhe trazojmë.

Sallata është gati për servirje.

Të nesërmen meqë më kishte mbetur pak sallatë festive e shoqërova me rukola dhe përfitova një sallatë tjetër për drekën :). Ju bëftë mirë.

Sallatë krokante festive

Atelieri i Përbërësve

Komentet (0)

Lini një koment